Cerpen Maura Ahna, SDN 10 Simpangkatis: ‘Sambut’ Langkah Pertama

“Ppiioooottt….. oh, Piiiooottt”, karoh Mak ko dari dapuk. Ko tekejut di karoh Mak macam ya, mesege tengah nyamen-nyamen mimpi. “Jadilah, Piot. Bangonlah, lah jem berape ni”, Mak ko ngeruce dak udeh-udeh. Jedi terpaksa ko bangon mereh Mak ko tengah di dapuk.

“O, Mak. Jedilah nugak ko ya Piot. Ko malau, nama bagus-bagus tapi di tugak Piot”, made ko kek Mak. Sebenar e nama ko ni Salpia, ya nama diberik Nek ko dulu e. Tapi urang kampong ni gati nugak ko Piot, ko bejik di tugak nama ya nih karena menurot ko nama ya dek bagus, ketak urang-urang jaman luk e.

“Jedilah ka sutek kek protes ya, tulong kicau lempah Mak nih kelak nya angos, Mak nak gi ngantar aik pusoi pesan urang nih”, Kata Mak ko. Nak dak nak ko nurot perintah Mak ko, dak kawa kena keruce. Ari ni sebenar e ko dak kawa nyusah ngapalah, sege ari ni libur.

Jedi maksud ati ya nak santai, bangon siang men. Tapi dak pacak nak kenak ati cam ya. Sege kate Mak ko, anak gadis jangan jadi urang males, kelak rejeki e sempet.

Siang ni ko lah cantik, lah rapi, lah wangi karna la udeh mandi, ko la makan laok ikan gureng kek lempah darat buatan mak ko. Lah udeh makan, ko duduk adap umah sambil maen hp. Tau-tau datang kawan ko Ijot ngajak latihan nari.

Ko kelupak bahwa ari ni ade jadwal nari, tekeria bai Ijot nempoh ko. Jadi e kami gi same-same bejalan kaki ke balai kampong dak jauh dari umah ko. Mimang kami asak latihan di balai kampong ya lah, pelatih kami nama e Yuk Sunai, die mimang penari lah lihai. Nak tarian apa geh nya pacak pukok e. Kami geh ikot nari ni gara-gara ningok die tengah nari tradisional di acara pesta kampong.

Mulai saat tu lah ko kek kawan-kawan ikot latihan nari, mulai senang kek tarian Bangka. Tiap ari Kamis kek Sabtu kami latihan e. “Ari ni kite latihan Tari Sambut ok, sege kelak ade bupati nak datang ke kampong kite nak ngeresmi mushola, jadi kite nak nyambut kedatangan bupati”, made Yuk Sunai.

Dateng ke umah ko langsung mandi, makan udeh ya lanjut agik latihan gerakan-gerakan yang lah di ajar tadi e. Sebenar e, gerakan e dak payah dak, mesege men tarian Bangka ni hanya diulang-ulang macam tu lah. Cuma ko ni agik dak tau makna dari Tari Sambut ni ape, ngape di sebut Tari Sambut.

Sege ni penampilan kami pertama kali di adap urang banyek, jadi kami pun harus belatih benar-benar, jangan sampai ngemalu kampong apa agik di adep bupati. Kami nak nunjuk kek bupati dan urang banyek bahwa budak-budak kampong kami banyak yang bebakat luk kali e tari.

Ko senang kek tarian Bangka ni karna iringan lagu e menggoda untuk begerak. Asak lah dengar bunyi musik Dambus Bangka ni, mulai dari kaki, tangen, kepala, badan pokok e gale-gale ikot begerak. Seger nian bunyi musik e. Gerakan tarian Bangka ni ge menurot ko gampang-gampang payah.

Petang ni, kami lah latihan ulik kek kawan-kawan. Ko nanya kek Yuk Sunai sebenar e ape makna Tari Sambut ni. Rupa ge Tari Sambut ni tarian untuk menyambut tamu urang penting atau wisatawan sebagai wujud rasa syukor kite kek bentuk keramahan kite warga Bangka.

Selain tu tarian sambut ni rupa ge menggambarkan kehangatan, kegembiraan, rasa hormat kite terhadap tamu yang datang tadi e. Tari ni biase ge dipakai di acara kawenan saat mempelai laki-laki datang ke tempat mempelai bini. Penari e biase berjumlah 5 urang, gerakan tarian ni sederhana cuma tangen melambai-lambai dan langkah kaki e yang ringan.

Alat yang dipakai tarian ni biasa e penari bawa semacam mangkok atau tepa sirih yang di dalam e diisik kek kembang rampai, kelak kembang ya tadi e di hamburkan saat tamu lah mulai bejalan masuk sambil sikok penari kelak e bawa payung untuk mayung tamu e. Kostum biase pakai baju adat Melayu Bangka, kadeng pakai baju Kurung, kadeng pakai baju Seting kek kain Cual.

Baju e nih macam baju penganten yang dipakai waktu betamat baca Al Quran. Men musik e pakai lagu khas Bangka alat musik yang dipakai tuh ade gong, gendang, kadeng dambus ge ade. Nah kira-kira macam ya lah penjelasan singkat tentang tarian Sambut Bangka.

Udeh nenger penjelasan Yuk Sunai tadi e, tambah semangat ko latihan karna ni hal baru bagi ko lah nambah ilmu, pengalaman baru ulik berkat Tarian Sambut ni. makin ingen ko kek tarian Bangka ni, rupa ge banyak lah tarian Bangka ni dak hanya sikok.

Ari ni kami latihan sampai jam 7 malam, sege rencana  acara  tuh hari Jumat, yang arti e agik due ari kami latihan. Mbo, dak ape yang penting kami pacak merik penampilan yang bagus kelak e.

“O, Piot. Perasaan Mak, ka nue ge sibuk latihan nari kini e?” Tanya Mak ko. “Aok Mak, Jumat ni kan ade bupati ke kampong kite, jadi kami di suro Yuk Sunai nyambut e pakai Tari Sambut, sebelum e kan kami dak suah nari ni Mak, udeh ge ni pertama kali kami tampil Mak.

Kededep kah rasa e”, Jawab ko. Mak merik nasihat kek ko sambil merik semangat kek ko karna ni mimang pertama kali kami tampil jadi harus merik yang terbaik jangan sampai ngemalu kampong.
Hari ni Yuk Sunai merik kostum tarian kami, rupa-rupa ge ko sebagai penari utama e yang kelak bawa tepa sirih.

Makinlah ko kededap e takot salah gerakan, takot kelak demam panggong karna baru pertama kali e. Ko tingok baju e warna mirah, ade kain cual, aksesoris kepala  lah macam penganten nian tapi versi penganten kecit. Kamik cube bajuk tu masing-masing, alhamdulillah pas untuk ko jadi langsung kami bawak pulang.

Waktu yang ditunggu datang, lah dak karuan agik ape yang ko rasa lah campur aduk. Ko ambik baju di dalam lemari, ko pakai baju kek rok e, ko minta tolong kek Mak untuk dandan dipakaikan jilbab e warna mirah lah. Sude e, pas ko nak pakai aksesoris kepala e, ko tingok ade beberapa yang patah.

“Oo, Maakkk. Ngape aksesoris ni patah, macam mana ni, Mak!” Rengek ko sambil nangis. “We ngape nya pacak macam ni” kata mak ko. Ko lah yakin pasti ni ulah adik ko, jadi Mak ko langsung nanyak kek adik rupa ge ye aok nian. Nya lah yang ngerusak e pagi tadi pas ko tengah mandi. Adik ko lah nanges ketakot, nya minta maaf dak sengaje lah ngerusak aksesoris e. Ko bepiker cam mana cara e biar nya agik pacak di pakai, akhir e ko gi ke tuko sambil nangis gi meli lem.

Sampai di umah ko langsung lem ulik aksesoris ya tadi e, biar pacak ko pakai karna agik sejam waktu tampil e. Mak ko langsung mucak make up ko yang lah luntur gara-gara aik mata kek keringat lempat gi ke tuko tadi. Ko tunggu sampai lem e kering, alhamdulillah agik pacak dipakai.

Ko tingok kawan-kawan lah nunggu, lah siap di posisi e masing-masing, ko pun langsung ambik posisi. Bunyi pentong gong tande mulai gerakan kami, hati-hati langkah kami nginjak karpet merah nuju ke arah bupati, kami gerakan tangen dengan gemulai, langkah kaki kamik ayun kek santai.

Kamik tabur kembang rampai tadi e waktu bupati lah bejalan masuk nuju tenda di adap musala, sampai bupati duduk kami agik lah nari sampai iringan musik e habis. Bupati kek tamu undangan laen e bediri merik tepok tangen kek kami. We ati ko rasa e lah campor adok dak pacak dikisah agik.

Dak terasa aben aik mata lah ngaler ulik. Rasa e bangga, senang, terharu lah pacak tampil di adap urang apa agik ni pertama kali e. Ni lah pengalaman ko yang paling berkesan mungkin seumur idup. Di berik tepok tangen dari bupati rasa e bangga nua, berarti tarian kami ni bagus. Ko maken sayang kek budaya Bangka nih apa agik kek tarian Bangka karna lah muat ko jadi percaya diri tampil di adap urang banyek.

Sejak hari tu lah ko kek kawan-kawan gati diundang tuk nari tradisional Bangka terutama di acara-acara kampong maupun acara penting laen e. kami lah dak canggung agik, karna lah biasa. kami geh pacak dapat duit dari tarian Bangka ni. jadi jangan berkecil ati men ikak nak ngelakon ape-ape, inti e usaha, yakin, doa kek Allah.**

Kurator: Meilanto, Habib Safillah, dan Sudi Setiawan.