Cerpen Angel Lee, SMP Bahagia Pangkalpinang: Jejak-Jejak di Belakang

Reporter: |

Editor: Budi Rahmad |

Selasa , 17 Dec 2024 - 21:31

cerpen angel lee, smp bahagia pangkalpinang: jejak-jejak di belakang                            suare kicauan burung, harum e tanah basah abis ujan, kek riuh e suare ombak la suah je denger kek rasein tiap ari di desa je. rafa same sekali dak ngeluh soal tu, malahan je cinta bener kek desa e, yakni desa rebo, gi bangka belitung. desa ni lah menjadi umah di mane je pacak ngelepas segale keluh kesah kek canda tawa dengan bebas.
lepas dari tu, desa ni punye tradisi-tradisi yang mayan banyak sampe ngebuet rafa makin tekagum-kagum kek desa ni. salah satu tradisi yang sering jorang lakuin adalah tradisi nganggung. nganggung ni tradisi ngebawak makanan (rantang/dulang) dari masing-masing umah ke suatu tempet besak.
tradisi nganggung ni akrab disenengin warga sege hangat e suasana saling betuker makanan yang dilukisin segale canda tawa yang nyejukin hati. rafa suka bener kek tradisi ni dari lubuk ati je yang paling dalem. namun, entah ngape semuen e berubah waktu rafa gi kuliah.
ya, kinik rafa la masuk ke dunia perkuliahan gi jakarta. tiada ari tanpa hiruk-pikuk e kota sibuk ne. semuen e lah serba pacak kek serba modern, tentu e. tradisi-tradisi nenek moyang kinik la mulai terdenger asing di bilong warga setempet. kehidupan modern kek digital kinik la mendominasi. rafa pun la terbiase kek rutinitas di perkotaan. tanpa disadari, je la mulai ngelupain tradisi nenek moyang yang nyaris ilang digantiin kek budaya luer.
pas tu, rafa tenga libur semester dan je la mikir nek pulang kampung. walau la beradaptasi dan lumayan teriket kek gaya idup baru je di kota, rafa dak pacak ngabaiken rase kangen je kek rumah je gi hanen. rumah e yang di tiep sudut e terisi kehangatan kek kekeluargaan. je pun mutusin buet pulang ke kampung halaman e.
sesampe e gi hanen, rafa gi sambut kek suasana hangat yang la lame dak je rasein. keluarge e, kawan-kawan e, dan tetangga je semuen e menyambut je dengan hangat. dengan bahagia, je pun pegi masuk ke umah masa kecit je. sekali je masuk ke hanen, rase e je la kembali dalem roda waktu, menjadi budak kecit yang duluk disayangin kek keluarge e. semuen e yang di umah tu dipenuhi kek kenang-kenangan mendalem.
gi hanen, rafa tentu e ngerase seneng pacak ketemu agik kek orang-orang yang begitu je sayangi. namun, je dak pacak ngeabaiin perasaan dalem diri je. je ngerase desa ni la mulai berubah. urang-urang kinik lebih sering terbenam dalem layar ponsel jorang, kongke lewat chat kek media sosial daripada kongke langsung. kini la dakde agik gema tawa gi lorong umah-umah, dakde agik suare urang-urang begagil kek bekongke gi luer umah macem duluk tu. la dak pacak diganggu gugat agik fakta e bahwa semuen e la teriket gawai kek teknologi.
waktu sore hari, rafa tengah duduk gi teras rumah je pas tiba-tiba kedenger suare yang dak asing ngemanggil je. suare tu dak laen dari suare nenek je, “rafa cucuku.. ki besok nganggung ok.. la lame kite dakde nganggung agik.” rafa pun langsung terdiem. je tau tradisi tu, ya pasti e je tau. selame je idup di desa tu, je terus ngelakuin tradisi tu tiap taun.
namun, rafa kinik ngerase terbiase kek kehidupan baru je tu yang ape bai serba modern. gengsi pun nyelimuti diri je.“nek, kan tradisi to la lame.. dak zaman agik dak, nek,” eluh rafa sambil ngerutin dahi je sembari ngembus napas dari rase heran, “alung kite ngelakuin hal laen yang lebih modern cem tu.”
ngenatap mate rafa dengan penuh harapan, nenek pun ngomong, “cuk, kadang yang kite anggep lame atau dak zaman agik ne biase e justru penting buet kite inget kek lestariin. kite tentu e pacak jalan maju, namun kite dak boleh lupain jejak-jejak di belakang kite. itu lah yang ngeberik kite arah.”
malem tu rafa dak pacak tiduk. kate-kate ninek e beputer teros kek keucap agik di kepale. saking kepikiran e, je pun beranjak bangun dari dipan terus pegi keluer ke teras umah. dingin e angin malem berhembus, menyapu rambut je dengan lembut.
suasana sepi desa ne ngingetin je kek masa lalu yang mayan kontras kek masa kinik. masa lalu di mane je dak suah absen nganggung. di tiap waktu apa je nganggung, selalu ade rafa kecit yang ngekanti dengan segale alesan konyol e. nganggung la kayak rutinitas yang la je lakuin dari kecit sampe je la bujang. dari ngeliet apa je nganggung, kinik je la yang nganggung. semuen e terase begitu indah pas tu.
kinik, tradisi tu la terdenger asing di bilong warga muda. dak jarang pula terdenger pertanyaan-pertanyaan tentang nganggung macem “ape tu nganggung wo?” di kalangan anak muda. hati rafa pun langsung jatuh dalem rase kecewa, ngedenger tradisi tercinta je la jauh dilupain.
ni ne karena semuen e la sibuk kek dunia baru jorang, di era digital. rafa dari dulu mikir kalo kehidupan modern la yang terbaek buet je. namun kinik je sadar, ade rase kangen dari dalem lubuk ati je yang dak pacak je penuhin anye kek teknologi dan kehidupan modern. dengan yakin, rafa pun ngemutusin buet cube nyadarin warga setempet, kayak care nenek nyadarin je.
hamparan sinar mateari kek hembusan angin sepai-sepoi ngenerpa muke je, rafa pun kebangun dari tiduk. tekad pun mengalir dalem darah je. je pun keluer dengan pecaye diri terus ngajak tetangga-tetangga buet nganggung same-same. terus, dak jarang pulik kedenger eluhan warga-warga muda terkait tradisi nganggung yang jorang anggep kuno.
“raf.. nganggung to la dak zaman agik la.”
“hadeh raf.. ribet nganggung to, alung kite gi umah bai.”
“dak dulu deh raf, jujur ku males gi.”
alesan-alesan tu terus diutarain dari sungot-sungot jorang. banyak yang nolak dan dak setuju kek ajakan je, tapi tu dak kan ngehentiin je buet terus mencube. umah demi umah je pereh, tolakan demi tolakan je terima, tapi pada akhir e ade terkumpul beberape warga yang masih nek ikut nganggung.
tergerek pulik ati jorang ngedenger ajakan rafa tu, jorang pun bangkit dan same-same pegi nganggung setelah sekian lame e. awal e, suasana masih canggung, tapi pada akhir e suasana pun dicairin kek segale macem lelucon kocak jorang. hari yang awal e terase monoton bersame gawai, kinik la diwarnai agik kek sederhana e kebersamean same orang-orang tersayang.
pas tengah ngangkat dulang kek bejalan ke balai desa same warga, rafa pun ngerase kebahagiaan yang dak pacak dijelasin lewat kata-kata, kebahagiaan tu begitu kuat sampe meluap dalem diri je. je sungguh bahagia ningok warga kembali bekisah kek begagil agik, ketabe yang ngemenuh ruangan ngeberi suasana hangat dan nyamen. hidangan-hidangan yang dibawa ge sungguh mengundang selera rafa kek tentu e warga-warga setempet.
rafa kek warga yang ikut nganggung pun nyadar suatu sensasi yang same. jorang ngerase bahwa tradisi ni seakan ngisi kekusongan ati dalem diri tiep urang yang ade gi hini, ngingetin jorang pada sesuatu yang lebih besak, yang ngehubungin jorang kek tanah, kek leluhur, dan kek satu same laen.
“weh, semuen e yok ikot nganggung gi hini!” ajek seurang bapak yang tadi e tenga nganggung ge. anak muda gi hanen nek nolak, namun ati jorang ngerase ni la pilihan yang paling tepet. jorang pun pegi nganggung agik. entah ngape walau jorang dulu kecit pegi nganggung e mungkin baru sikok ape tige kali, jorang ngerase rase idup, seneng, kek bahagia pun seketika tercampur semuen menjadi satu.
kinik jorang akhir e la sadar bahwa kite tentu boleh ngikut perkembangan zaman, tapi jangan sampe kite ngelupain hal yang ade semesti e.
sejak ari tu, warga desa rebo mulai sering nganggung agik. dak anye nganggung, tradisi laen e yang cemtu banyak pun dilaksanakan agik. contoh e kayak mandi belimau, peh cun, cheng beng, nujuh jerami, maras tahunan, perang ketupat, dan masih banyak agik.
pada suatu sore, rafa gi ke suatu pantai terus duduk di tepi pantai, meningok senja yang perlahan tenggelem ditemenin kek sejuk e angen laut. pas tu, je ngerenungin keputusan yang lah je ambik. dari lubuk ati yang paling dalem, je berterima kasih kek nek e yang la ngebuka mate je, yang la ngajarin penting e budaya gi bangka. bila ari tu nenek e dak ngomong kek je, palingan desa ni kan berubah menjadi yang tentu e dak diinginkan.
“nek, sinmung ok la ngomong kek ku pas tu,” ucap rafa, mengeluarkan ketabe kecit.
“aok, sebener e ukan nenek yang la ngubah desa ni jadi cemni, ni sesungguh e dari tekad kek usaha ki, nak,” kate nek dengan pelan. rafa pun ketabe.
“kini ki la tau lom nek ngape ke depan e, nak?”
“tentu la tau o nek, kite harus terus ngelestariin tradisi kek budaya kite walau la masuk ke era modernisasi,” jawab rafa dengan yakin.
“aok dan jangan lupa, kite boleh jalan maju, tapi jangan ngeninggel jejak-jejak kite di belakang. itu lah yang ngeberi kite arah.”
dengan pecaye diri kek tekad yang lah menjadi bagian dari diri je, rafa pun setuju dan berjanji kek semuen e dan diri je. je akan terus ngelestariin budaya kek tradisi di bangka maupun di desa je, sege budaya lah yang nyatuin kite semue, nyatuin kite kek tanah yang lah kite pijek.**kurator: meilanto, habib safillah, dan sudi setiawan.

Tag

Share

Koran Terkait

Kembali ke koran edisi Babel Pos 18 Desember 2024

Berita Terkini

Berita Terpopuler

Berita Pilihan