Cerpen Nabila Putri, SDN 10 Payung: Nganggung di Kampung Bedengong

Reporter: |

Editor: Budi Rahmad |

Selasa , 17 Dec 2024 - 21:28

cerpen nabila putri, sdn 10 payung: nganggung di kampung bedengong                            mate ari pagi ni la mulai mancer di langet kampong bedengong. ari ni, kampong bedengong terase lain dari biase e. ade asep ngepul di beberape  uma urang kampong. asep tu dari dapuk uma urang di kampung. mambu urang ngerendang kue mulai ke hiem. rupe e, dak lame agik ken rayo puaso. ari ni la puaso ke 25. hebentar agik la ken rayo, mak-mak la mulai bebuet ken kue.
di kampung ni ku tinggel ken aya, mak ken ade hikok abang. aku ge ade kanti name e nisa, dela, ken akila. men bulan puaso kayak ni hampir hemue urang kampong puaso. yang dak puaso e berik-berik kecit.
hude bulan puaso, pasti ari rayo. ku ingen men ken rayo, banyak kue ken pemaken lain e. ade la beberape uma urang di kampong meri thr ken berik-berik kecit yang namu ke uma e. ku ken kanti-kanti ku ingen men  dapet thr.
hude bebukak ku tingok aya la pakai baju koko ken gi hembayang terawi di mesjid. ”aya, kelak men la rayo ngumpol ok? ” tanyak ku ken aya. ”aok, di masjid”, nyaot aya ku. ”o ... o ... o..., mbolah ”, kate ku.
ari ni ari minggu urang libur hekula pas due ari ken rayo. ku tingok mak tenga muet harong ketupat ken lepat pakai daun kelapo yang gik mudak. lihai mak ku muet e. men ari rayo dak ketinggel ketupat lepet untuk di maken pas ari rayo.
ketupat biase di maken kanti ayam lempa kelapo atau daging rendang. men  lepet dicecep ken hambel asem. hambel asem ni rase a campor, ade rase manis, asem, ken pedes. hambil muet ketupat lepet, mak ku muet kue luyang.
kue luyang yang biase di buet mak ku name e kue remeng.  ku lom pacak muet harong ketupat lepet ken kue,  jadi ku nulong mak nyuci pireng, nyapu uma, ken mueng perampak bekas mak muet harong ketupat ken lepet tu jadi la.
la hude nulong mak, ku tiduk hiang. ku tiduk e di adep tv. sege panas pol, kipas angen ku paseng. men dak cem tu dak tetiduk. nyaman rase e tiduk hiang.
haking nyaman e dak terase ari la lemari. untung di tugak mak ku, men dak e hampai megrib ku tiduk. la hude angket ku mandik ken hembayang asar. hambil nunggu siung bebunyi tando bebukak, q duduk di liper ningok urang lalu. dak berape lame siung bebunyi, kami hekeluarga bebukak.
bebukak la hude, ku ken kanti ku hembayang terawi di musola barat. la hude hembayang kami pulang ke uma masing-masing.
"mak, aya, ku nak gi ke mesjid luk, mbo?” tanyak ku.
“ka gi ngape wah?” nyaot mak ku.
“urang ade acara di mesjid!” kate ku.
“oo, mbo!” nyaot mak ku.
ku langsong ke mesjid jalan kerito listrik. di mesjid ade acara sholawat. sholawat e nye hebentar, hampai jam hembilan malem. dari mesjid, ku balek ke uma. hampai di uma langsong ke kamar mandik nyuci tangan ken kaki biar berse  dari kuman. hude tu ku maco doa luk hebelum tiduk.
sinar mate ari masok liwat lubang angen kamar ku, hekali ku bukak mate pacak hilau. rupe e ari la pagi. ku cepet-cepet hembayang hubo hude langsong mandik. ku tingok aya beringkes ken gi kebon.
“aya, ku gi la ok ngikot ke mesjid ari rayo kelak?” tanyakku.
“gi ngape? nye ken gi cekau di mesjid, ngacau urang kelak gawe e!” nyaot aya ku.
“wee ya, ajak la ku ne. ku nek ningok langsong, cem mane urang ngumpol to!’’ kelak ku pacak tahu ngumpol tu ape, gune ape, macem mane acara e. helame ni ku nye nenger dari kisah urang!” kate ku ngerayu aya.
”weh, men biase e berik-berik gi ke mesjid nye gi ngacau, gi biseng, begagil gawe e!” nyaot aya ku la mulai kesel.”mbo, aya pukok e ku be janji dak ken biseng, cekau ken ngacau urang di mesjid!”  rayu ku pulek.
lame aya miker e, hude tu kate a, ”hmm, mbo lah, tapi awas ok men ngelanggar janji, kelak-kelak e dak usa ngikot kumpol agik ke mesjid”.
”yess,,mbo ya ku janji” kate ku hambil heyum karena ingen.
hari sebelum rayo ku nanyak ken mak ku, ”mak ade dak yeng ken nek di tulong?”. 
”dak de dak...” nyaot mak ku.
“ooo... men cem tu ku maen ken kanti ku, ok?” tanyak ku.
”mbo, dak usa lame-lame” kate mak ku.
ku gi ke uma dela, karna uma die dekat ken umahku. pas la dateng ku langsong nugak die.”del ....o...dela,,maen yo!” kate ku.
"oyy, yo!” nyaot dela.
”kite maen ape?" tanyak ku.
"hmm, cem mane men kite maen karet!” nyaot dela.
”mbolah, bagus la maen tu” kate ku.
kami maen di adep uma dela. care e migep karet e, kamik kebat ke tiang uma dela. bejam-jam kami maen hampai akhir e ari la peteng. ku balek dari uma dela nak bebukak hame-hame di uma. di malem ari rayo ku ken kanti ku kelileng kampung ngikot urang takbir. takbir di mulai dari adep mesjid lanjut ke barat, hude tu ngulek pulek ke jalan tadi, langsung ke timor. akhir e di adep mesjid.
dak nye takbir, di malem rayo banyak bunyi percon ken bedil di kampong, ku langsong ke luar nak ningok e.  hampai percon ken bedil dek de agik bunyi e. hude tu langsong ke uma nyuci tangan ken kaki luk baru tiduk.
pas hapagi e la rayo. mak la besiep  ken uma mulai dari kue, pireng ken mangkok untok urang maken pentol. ku inget tiduk langsong mandik, karna nak gi ngikot aya ke mesjid. hude mandik, ku behalin bajuk bajuk muslim baru di kamar. hude e ngikot aya ke masjid.
di hane ku betemu ken kanti ku dela, akila ken nisa. ku nek ngikot urang tu, hebelum e ku la made luk ken aya dan aya nyurok. ku langsong mere kanti ku, rupe urang tu ngikot mak e.
”ikak marak la ok ngumpol e?” tanyakku.
"marak!” nyaot dela.
"men ku marak! " nyaot uge akila.
”ka marak la ok?” tanyak nisa ken ku.
 ”marak! "nyaot ku.
"o... yo  ke dalem!" ajak nisa.
kami urang empat masok ke dalem mesjid. di dalem mesjid ketingok banyak urang tue mudak, berik-berik la duduk rapi ngadep siana ken  beberape ikok dulang yang bejijer rapi di atas tiker ken karpet. urang-urang di dalem mesjid rate-rate pakai baju bagus. acara ngumpol ari rayo marak e hude hembahyang rayo.
di kampong kami men nujo urang ninggal, marak ngumpol se kampong acara e hude megrib. waktu ngumpol biase dak tentu, tergantung ape yang ken di buik ngumpol. men maken nasek marak e hude megrib tapi men maken kue marak e hude iso.
men di rase la datang hemue, kaben urang tue atau ustad memimpin doa mintak keberkahan ken allah yang maha esa. la hude bedoa, urang-urang mulai mukak siana atau dulang yang ade di adep urang tu.
bemacem-macem isik siana e, mulai dari laok , ayam panggang, ketupat lepet, ken bua-bua. berik-berik pol ingen e.
“banyak  pemaken ok!” kate ku.
“aok nian, biase e nye hadiket” nyaot nisa.
"dugo e, urang la banyak cinta ken budaya bangka ” kate dela.
budaya nganggung (ngumpol men bahasa kampong kami) ukan ge hanye makan hame-hame, tapi acara untuk betemu ken urang-urang, rase persaudaraan pacak jadi erat.
la hude makan, urang-urang mulai ngeringkes dulang ken siana masing-masing. ade yang mutek perampak, ngelap aik yang tumpa. ku ken ke empat kanti ku tadi nulong nyapu e.
heger rase e pacak kumpol hame-hame cem ni. mudah-mudahan la acara kumpol ni ade teros, pacak betahan di jaman modern cem ni.**kurator: meilanto, habib safillah, dan sudi setiawan.

Tag

Share

Koran Terkait

Kembali ke koran edisi Babel Pos 18 Desember 2024

Berita Terkini

Berita Terpopuler

Berita Pilihan