“Ne Jang, dak terase la lime taon kite ditinggel ruah Abok. Duluk men agik ade ruah Abok, pesta budaya di kampong ne dek sua sepi,” cakap Mak sambil merseh rumpot di atas kubur Abok.
“Aok nian Mak ok. Ku agik inget duluk ikot ruah Abok gi acara Ngarak Bungkol, bungkol e disusun tinggi-tinggi kek dihias bagus-bagus sude tu di bawek keliling kampong. Pukok e pas tu meriah acara e,” kate ku sambil nginget kenangan kek Abok, “sude ngarak bungkol kami gi nganggung ke balai. Urang benyek mawek pemaken.
Ku duluk paling ingen makan lakso habang kek lempah kuneng. Tapi kini sejak ku lulus SMA urang dek sua agik nganggung kek ngarak bungkol.”
Pulang dari kubur, ku tepiker nek jadi urang bepengaruh macem Abok duluk e. Ku nek budaya di kampong ni tetep tejage. Pas la liwat tenga ari ku bepiker untok gi ke kantor desa mere pak kades nek made tentang ide yang la kupiker ni kek minta pendapat e.
“Assalamualaikum Pak Kades,” cakap ku pas di adep lawang ruang Pak Kades.
“Walaikumsalam. Oh Riki. Yo, masuk,” jawab Pak Kades ramah, “yo duduk la. Ade ape, Ki?” Tanya Pak Kades.
“Cem ni Pak, ku tekeneng duluk pas ruah Abokku agik idup ramai pesta budaya di kampong ni. Tapi kini dek suah agik ade pesta budaya di kampong. Cem mane misal e kite adain pesta budaya di kampong men ade ari besak Islam atau ari besak nasional supaya budaya kite ni tetep tejage.”
“Bagus rencana Ka, Ki. Tapi kayak e saro men nye surang Ka yang begawe. Cemane men malam ni kite kumpol sesame bujang kek dayang di kampong ni?” Usul Pak Kades.
“Oh mbo la Pak men cemtu. Kelak pulang ne Ku pacak made undangan e,” kate ku sambil permisi pulang.
Pulang dari kantor desa ku langsong made kek kawan-kawan tentang undangan Pak Kades untuk kumpol di balai desa. Pas malem ku gi kek kawan-kawan ke kantor desa. Sampai di sane kami duduk di kursi samping pak kades.
“Assalamualaikum. Lah datang semue lom?” Kate Pak Kades.
“Walaikumsalam. Lah datang bai la pak,” jaweb kami.
“Aoklah men la dateng semue. Jadi maksud Bapak ngumpol ikak semue di sini karna rencana e kite nek muet organisasi tokoh budaya. Organisasi ni untok ngelestariken budaya yang ade di kampong kite. Bapak nunjuk Riki yang jadi ketue e. Kelak kite buet acara pesta budaya di kampong. Ikak yang ngurus e, kelak untok dana kelak pacak bapak yang ngurus e,” jelas Pak Kades.
Sude tepilek jadi ketue organisasi tokoh budaya, ku kek pengurus organisasi lain nyusun program pesta budaya untok ngerayo Taon Baru Islam. Pas rapat ku dapat banyak saran dari kawan-kawan.
Ade yang nek acara hikok helawang, ade yang nek nganggung, nek ngarak bungkol, kek nek pawai bajuk adat. Pas la banyak bedebat akher e kami putusken untok ngelaksana semue e untok pesta budaya.
Benyek persiapan yang la kami gawe. Kami optimis acara kelak e pacak bejalen lancar. Rupe e pas ari la deket kek acara, ade sekumpol urang dek setuju kek rencana kami.
“Untok ape entah saro-saro muet pesta budaya. Along ge kami gi manceng di aik deket kebon Bok Dawang,” kate salah sikok urang tu.
“Ikak ne. Kami muet acara ni untok ngelestari budaya di kampong kite ni. Men dak kite urang mudak siape agik nek ngejage budaya ni,” jawebku.
Suasana la dek kondusif agik. Kami panitia kek sekaben urang tu banyek bedebat. Dek kawa jedi kelai akher e ku mere pak kades untok mintak saran.
“Pak kaben Amang Dem dek ngedukung rencana untok pesta budaya. Tadik urang tu mere kami. Jadi cemane Pak ok, kire-kire kite lanjut dek pesta budaya ne?” tanyakku.
“Dek usah dipiker Ki. Mang Dem imang cemtu urang e dari duluk, dek sua setuju untok kemajuan kampong. Ikak lanjutlah pesta budaya e. Kelak kite undang Bupati untok dateng biar acara kite semaken meriah,” kate Pak Kades. Akher e kami tetep ngelanjut persiapan pesta budaya.
Dek terase sampailah di ari pelaksanaan acara pesta budaya. Acara e dilaksana beberape ari. Ari pertama pesta budaya acara e nganggung di balai. Dek kelupak ade telok serujo yang la disiap untok dibagi-bagi kek urang kampong.
Ari kedue pesta budaya acara e pawai bajuk paksian kek baju cuai. Pawai ni kami keliling kampong. Pas tenga ngeliwat aik deket kebon Abok Dawang, Aku sayup-sayup macem nenger suare urang mintak tulong.
“Dul, Ka ade nenger suare macem urang mintak tulong dek?” Tanyakku kek Dul, kawan sebelehku.
“Aoknyan Ki. Ku ade la nenger e dari tadi. Ku nyangkak nye perasaanku bai. Rupe ka nenger lah ok?” Kate Dul.
“Kire-kire suare dari mane tu ok?” Tanyakku
“Kayak e dari aik tu sumber suare e. Ka inget dek kate kaben Mang Dem urang tu nek manceng ikan deket aik tu,” kate Dul.
“Aok nyan ok. Yo, kite tingok, kelak ade ape-ape,” usulku.
Akher e Aku kek Dul nyarik sumber suare urang mintak tulong to. Kami nyarek kea arah aik sungai. Pas la deket aik kami tekejut pas ningok ape yang tejadi di aik.
“Tuloooong!!!! Sakeeee!” Surak urang di aik yang ternyata upe e Mang Dem.
“Ade ape Mang ngape badan ikak pacak bebalu ne?” tanyakku.
“Kami tadi ketemu mentilen, nek kami tangkep untok kami juel. Pas kami migeng mentilen tu baden kami langsong bebalu. Sude tu mentilen tu tiba-tiba ilang,” kate Mang Dem.
Nenger tu ku kek Dul heran, “ngape Dul ok tiba-tiba baden Mang Dem pacak balu pas migep mentilen?”
“Entahlah ku ge dak tau,” jaweb Dul sambil bepiker, “tapi aseku ade duluk ruah Abok ka ngisah kek kite men deket aik ne ade barang mese muncol setiap bulen Muharam.”
“Aok nyan ku tekeneng la kek kisa tu. Kelak e barang mese yang kate Abok ku to mentilen tadi. Rase ku kate Abok duluk penyaket dari barang mese deket aik ni pacak nular ke urang. Jadi lebih baik e acara pesta budaya ni kite tundek dulu sampai penyaket ni ilang,” kate ku.
Sude tu ku ngajak Dul kek kaben Amang Dem gi pulang. Dek kelupak pas la nyampai kampong ku langsong made kek urang kampong bahwa acara ditundek. Sude tu ku langsong pulang ke uma nyarik Mak untok betanyak sesuatu.
“Mak kaben Mang Dem tekene penyaket mese yang kate ruah Abok duluk. Siape Mak kate ruah Abok duluk urang yang pacak ngubet penyaket ne?” Tanyakku.
“Men dek salah ade Abok tue deket ujung kampong tu tau ngubet penyaket ne,” jawab Mak.
Sepagi e ku ngajak dul gi ke uma abok tue deket ujung kampong. Pas sampai di sanin kami tau dari tetangga e rupe Abok yang kami cari ternyata la ninggel.
Tapi sebelum Abok tu ninggel die la bepesen kek tetangga e kalau ade urang nyarik die nek berubat suroh mere murid e yang di Habang. Kene dek de pilihan lain akher e Ku kek Dul gi ke Habang gi mere mured Abok tue. Jalan yang kami tempo cukup jauh. Jadi kami kene bemalem di sanin. Beberape ari kami nyarek mured Abok tue tapi dek ketemu.
Siang tu kami gi ke deket Batu Belimbing, di situ kami ningok urang yang mencolok, urang tu makai baju paksian lengkep, kain cuai, kek stanjak. Akher e kami mere Amang tu untok nyarik informasi.
“Mang ente kenal dek kek Amang Yan mured Abok tue?” Tanyakku.
“Oh. Amang ni la Amang Yan. Ngape ikak gi ke hini?” Kate Mang Yan.
“Kami ke hini nek nyarek ubat untok penyaket mese. Kate Makku, Abok tue pacak ngubet e, tapi abok tue la ninggel, jadi kami disuroh nyarik Amang ke hini,” kateku.
“Oh macem tu. Aoklah tunggu luk ok,” kate Mang Yan sambil ngambik mese dari kantong e. “Ni ne ubat penyaket mese e. ubat ni dimaken sekalek, sude tu dalem waktu se ari penyaket tu langsong ilang,” sambil merik 3 ikok kunyet.
“Aoklah Mang. Makaseh banyek ok.”
Sude tu kami langsong pulang ke Payung kene la dapet ubat penyaket mese. Sampai di Payung kami bingung cemane magi kunyet ni karna urang tekene penyaket mese ni la betambah tapi ubat e sikit.
Sude tu ku mintak saran kek Mak ape solusi untok permasalahan ni.
Akhir e Mak merik saran kalau kunyet tu along di buat lempah kuning, jadi semue urang yang tekene penyaket ni pacak bai maken e. Ku pun setuju kek ide Mak, karna tu solusi terbaik menurut ku. Akher e ku mintak tulong kek Mak untok masak lempah kuning makai kunyet kek diberik Mang Yan untok ngubet penyaket mese.
Pas lempah kuning e la masak ku nungek kaben Mang Dem kek urang kampong laen yang tekene penyaket mese untok makan lempah kuning supaya penyaket e ilang. Syukurlah seari sude makan lempah kuning penyakit tu ilang.
“Makaseh Ki ok ikak la nulong kami,” kate Mang Dem ngewakil kawan-kawan die lain e. Mang Dem kek kawan-kawan e nyesel karna dek nek ikot berpartisipasi di acara pesta budaya kampong. Akher e pas kesesak upe e nye tokoh budaya lah yang nek nulong e. Sejak tu Mang Dem kek kawan-kawan bejanji untok ikot serta acara pesta budaya kampong.
Karna masalah penyaket mese la selesai, akhir e pesta budaya dilaksanakan agik. Acara e meriah. Bupati secare khusus dateng pas puncak acara pesta budaya di Kampong Payung. Bupati pun ikot pawai bungkol sude tu langsung nganggung di balai desa.
Acara Pesta Budaya berlangsung meriah, semue urang kampong seneng. Aku pun ngerase bangga karena lah pacak jadi tokoh berpengaruh kayak ruah Abok ku duluk e.**
Kurator: Meilanto, Habib Safillah, dan Sudi Setiawan.
Kategori :