Cerpen Eva Fitriana, SDN 13 Mentok: Cik Muncik Asyiik

Siang tu hawe ni panas sangat. Kamik murid kelas 6 ni lah begadoh panas, ngantok, laper polak. Dak lame tu masoklah guru kamik, Bu Riris.  Due jam terakhir ni pelajaran Muatan Lokal. Rupe e pelajaran Muatan Lokal hari ni tentang permainan tradisional, name e Cik Muncik. Jadi penasaranlah kamik sekelas. Yang tadik e ngantok jadi mencelak mate, yang tadik e bekipas-kipas langsung tegak konsentrasi nek nengar Ibu Guru becakap.  Kawan-kawan yang bace cerpen ni pasti penasaran juge, kan?

“Anak-anak, ikak generasi mudak ni harus tau macem-macem permainan tradisional daerah kite. Sebab permainan tradisional ni bagian dari budaya kite.” Bu Riris ngejelasin panjang lebar tentang permainan Cik Muncik ke kamik sampai kamik pahamlah macem mane permainan tu.

Permainan Cik Muncik tu, kawan … dimaenken oleh due regu. Seregu tu bejumlah sepuluh urang, ditambah Nduk sikok jadi tige belas urang.

Nduk kedue regu ni suit, yang menang jalan dolok. Ape yang digawe? Anggota regu bebares posisi tangan e di belakang sambil nyanyi macem ni “Cik…cikmuncik paikolom coket lokom, lokomsam, sam maksam, jinoyang, mopinang, guk-guk ser pakser, guku-guk ser pakser.”

Nduk bejalen di belakang barisan, terus ngisi batu di tangan salah sikok anak buah e. Pas nyebut “guk-guk ser pakser” anak buah tu ngangkat tangan e yang tegenggem ke atas. Nduk regu lawan nebak di tangan siape batu tu.

Kalok ketebak, anak buah e jadi anak buah lawan. Macem tu kawan garis besar permainan e. Inti e diujung permainan tu kedue regu betarek macem lomba tarek tambang tapi tanpa talik. Seru eh kawan. Permainan ni memupuk rase setia kawan kek gotong royong. Macem tu kawan sekilas tentang permainan Cik Muncik ni.

Oh ye, kawan … name saye Eva. Sekulah di SDN 13 Mentok. Sekulah kamik ni sekulah berbasis budaye lokal, tapi bewawasan global. Kamik punye Ari Budaye, yaitu ari Selase. Di ari tu kamik anak puan pake baju Kurung Melayu, anak laki pake bajuk Teluk Belange. Ari tu guru kamik ngajar di kelas pake bahase Melayu Mentok.

Selain tu, biak di kampung, sekulah kamik tu ade “English Days” yaitu ari Rabu. Di ari tu kamik mesti becakap pake bahase Inggris biak pon dikit-dikit. Macem semboyan kantor bahasa yang bebunyi “Utamakan Bahasa Indonesia, Lestarikan Bahasa Daerah, Kuasai Bahasa Asing “macem tu, Kawan.
“Eva…lah dapet berite baru lum?” Sekar nemu saye di gerbang pas saye turun dari motor Mak saye pagi ari tu.

“Lum. Berite ape tu, jadi penasaran?”

“HUT Mentok ke-290, minggu depan ade lomba Permainan Tradisional. Sekulah kite ikut lomba. Siap-siaplah kite kate Pak Diki.”

“Lomba ape? Emang kite yang dipilih ikut?”

“Pastilah, siape agik? Permainan Cik Muncik eh lomba e.”

Sok kepedean polak Sekar ni. Tapi memang benar akhir e kamiklah yang dipilih ikut lomba tu. Saye, Sekar, Sabil, Nabila, Tiwi, Yang Dinda, kek lime agik kawan saye yang laen e.

Tibe lah ari lomba. Tim kamik lah mempersiapken diri dengen sekuat tenage. Rupe e Tim kamik belawan kek Tim SD 12.

Ampon Mak …. diurang tu macem tenage kude. Badan pon besak-besak. Sementara Tim kamik, kecit-kecit sekerimut. Namun, saye hiburlah kawan saye kalok kite lomba ni menang kalah tu lah biase. Yang penting kite bise ketawak, bise ngerase senang, juge gembira.

Dari lime belas pasang tim yang betanding, kamik dapet urutan ketige. Tibe tim kedue lah nek selesai betanding, kawan saye, Sekar lum datang juge. Tim kamik lah mulai gugup ni. Leher lah panjang ningok ke jalan. Lum ade-ade lah nampak motor Mak Sekar ni.

“Priittt….” Peluit wasit bebunyi nandeken pertandingan pasangan kedue antara SD 5 kek SD 7 selesai.
“Selanjutnya, SD 13 melawan SD 12” kedenger suare wasit manggil-manggil.
“Ayo cepet!” Pak Diki nyuruh kami masuk ke arena.
“Tapi, Pak…Sekar lum datang,” hampir nangis Nabila ngelapor kek Pak Diki.

Tibe-tibe…
“Kawan-kawan…” Sekar belari bekicing nemu kamik, napas e tesengel-sengel sege belari. Rupe e die telat sebab motor Mak e pecah ban di jalan. Untung ade tetangge liwat yang nek ngantar Sekar ke lapangan. Alhamdulillah kamik bise belomba dengen tim lengkap.

Kamik pun mulai maen cik-cik muncik langkah demi langkah.  Nah, pas bagian akhir lomba ni, kami betarek ngelawan Tim SD 12 yang kuat-kuat tadi. Saye baris di urutan paling belakang sebab badan saye agak besak, biak untuk pertahanan. Di depan saye, Yang Dinda. Kanak ni pemalu sangat.

“Satu…Dua…Tareeek!” Suare juri ngegak kami saling betarek. Maseng-maseng tim betahan supaye dak roboh.

“Satu…Dua…Tareek!” ulang agik kamik betarek. Tetep dakde yang roboh. Nah, pas juri berek aba-aba yang ketige ni “Satu…Dua…Tareeeeek!!!

Kami berusaha sekuat tenage hingge kedenger suare “preeet...” teciumlah bau belerang. Besamean dengen tu, tim lawan pon roboh bejamaah. Kawan-kawan besorak-sorai atas kemenangan tim kamik, tapi saye penasaran, bunyi ape tadi tu. Saye tengok muke Yang Dinda besemu merah.

Ape Yang Dinda….? Ape gara-gara tu polak kami bise ngerobohkan lawan tadi? Saye simpen dalem ati jak pertanyan ni, jangan sampe saye buka aib urang. Yang penting kami kompak, kami menang, kami senang. Bener dak, kawan? Yang lebih penting agik, kamik mengenal, mencintai, kek ngelestarikan Permainan Tradisional sebagai bentuk cinta budaye Bangka khusus e, budaye Indonesia umumnye.**


Kurator: Meilanto, Habib Safillah, dan Sudi Setiawan.